MAKALAH INDIVIDU ILMU ALAMIAH DASAR (IAD)

 

ILMU ALAMIAH DASAR

(IAD)

KOPI 

Olih

Ni Luh Putu Ekayanti Savitri

NIM.1112051057

III B

JURUSAN PENDIDIKAN BAHASA BALI

FAKULTAS BAHASA DAN SENI

UNIVERSITAS PENDIDIKAN GANESHA SINGARAJA

2012

PANGAKSAMA

Om Swastiastu

                  Suksma kaaturang majeng ring Ida Hyang Widhi Wasa, saantukan sangkaning pasuecan lan asung kerta wara nugrahaIda lan utsaha sang sane nyurat, cakepan alit puniki prasida puput kasurat ring temponyane.  Kriya patra sane mamurda “KOPI” dumogi ja mawiguna ring sajeroning kauripan iraga, utaminnyane ring materi Ilmu Alamiah Dasar (IAD).

                  Sang sane maraga nyurat kriya patra puniki ngaturang suksma majeng ring sapasira sane sampun ngewantu daweg kakaryanin kriya patra puniki. Saantukan yening nenten wenten wantuan saking para yowana miwah angga sekaa sinah kriya patra puniki nenten prasida jangkep.

                  Dumogi napi sane sampun kakaryanin prasida ngicenin widya ring sajeroning kauripan soang-soang. Nenten lali sang sane maraga nyurat kriya patra puniki nunas piteket lan pamatut mangda kriya patra puniki prasida jangkep tur paripurna. Pamuputnyane, sang sane nyurat kriya patra puniki banget ngelungsur gengrena sinampura menawi wenten sane tan manut ring arsa ida dane soang-soang.

Om Santih, Santih, Santih Om

                                                                                    Singaraja,  November 2012

                                                                                         Panyurat

ADIAYA I

PAMAHBAH

1.1 Purwaka

Ring aab modern utawi sane ketah kabaos jaman globalisasi jakti nenten wenten jadma sane nenten uning indik kopi. Kopi inggih punika silih sinunggil inum-inuman sane sampun kasub ring jagate, taler makasamian jagat uning napi kopi punika. Ring aab sekadi mangkin kopi silih sinunggil inum-inuman sane patut wenten ring soang-soang umah, jero utawi ring griya, akeh jadma sane nadosang kopi anggen inuman ritatkala semeng.

Manut saking para sujana, kopi madue makudang-kudang kawigunan majeng ring sang sane nginum, nanging ritatkala kainum nenten akeh. Sadina-dina jadma ring jagate nginum kopi lebian tekening agelas. Kopi punika kasub sareng kandungan kafein sane akeh.

Manut saking widya ilmiah, kopi punika wantah inum-inuman sane wit saking proses pengolahan lan ekstraksi biji kopi punika. Kruna kopi mawit saking basa Arab inggih punika qahwah sane maartos kekuatan, riantukan sane dumunan kopi punika kaangen dados ajeng-ajengan lan inuman sane madue energi sane makeh lan tinggi. Kruna qahwah punika raris mauwah dados kahveh sane mawit saking basa Turki, raris mauwah malih dados kruna koffie sane mawit saking basa Belanda. Usan punika kruna koffie kaserap ring basa Indonesia dados kruna kopi sane kaanggen ngantos mangkin.

Kopi rumasuk ring kulawarga Rubiciae, bangsa coffeeae, genusnyane coffea lan spesiesnyane coffea Arabica. Kopi punika wantah entik-entikan sane kawentenannyane makehan ring sakancan genah ring Indonesia. Caciren entik-entikan punika sekadi madue don sane menyirip, kulit punyannyane mawarna coklat selem lan nenten madue punyan sane tegeh. Kopi marupa entikan soroh dikotil sane kawigunannyane akeh kaanggen inuman. Nanging sane mangkin kopi punika akeh kaangen dados ajeng-ajengan ring panegaran sane sampun maju. Kandungan kopi nenten ja madue kafein kemanten nanging kopi taler madue protein.

Yening kaselehin, wenten kalih soroh kopi, inggih punika kopi arabika utawi kualitas sane becik lan kopi robusta. Sejarah nilikin indik panemuan kopi dados inuman sane madue kawigunan lan madue energi, kapertama katemuang olih bangsa Etiopia ring benua Afrika sawatara ring warsa 3000 utawi 100SM sane dumun. Raris kopi punika nglimak ngantos mangkin, sane mangkin kopi punika dados inuman sane kasub ring jagat lan akeh kainum ring sajeroning parajana. Indonesia sampun parsida ngasilang kirang langkung 400 ribu ton kopi ring ajerong atiban. Lianan ring punika, kopi madue rasa tur bo sane becik, kopi taler prasida nguangin resiko gering kanker, diabetes, batu empedu, gering jantung utawi kardiovaskuler. Para sujana nyambatang, ipun sane teratur nginum kopi prasida ngicalang gering stroke. Utaminnyane yening kainum 3 ngantos 4 gelas arahina. Hasil tetilikan puniki sampun katelatarang ring American Journal of Epidemiology sane nelatarang indik kandungan antioksidam ring kopi prasida ngawantu ngalancarang aliran rah saking angga ka otak. Rumasuk nguangin pembekuan rah ring otak lan nguangin paningkatan kadar kolesterol ring sajeroning rah. Panelitian taler nemuang, ipun sane nginum 2 gelas kopi arahina, madue resiko 14% lebih cenik keni pembekuan rah ring otak sane ngawinang gering stroke.

Ring kawenten kopi sane sampun kasub, akidik jadma utawi nenten wenten jadma sane uning yening ampas utawi tandekan kopi punika kari madue kawigunan. Parajana wantah uning kawigunan ring sajeroning nginum kopi, nanging ring sajeroning iraga nginum kopi punika, wenten ampas utawi tandekan kopi sane madue makudang-kudang kawigunan. Makehan jadma nenten seneng ring ampas kopi. Satmaka pah-pahan saking keutuhan sane kaicalang. Meneng ring sor gelas sane isinnyane sampun nenten kebus malih. Kakutang dados luhu, pait lan wantah ngantosang ical ring genah ngumbah piring.

Ampas utawi tandekan kopi dumunnyane wantah dados luhu, nanging sane mangkin iraga prasida nganggen ampas kopi punika mangda prasida mawiguna dados makudang-kudang soroh barang utawi produk kecantikan utawi sane lianan sane madue nilai ekonomis.

1.2 Pikobet

1.      Napi kopi punika lan napi maten soroh-soroh kopi ?

2.      Napi manten dampak positif lan negatif ring sajeroning nginum kopi?

3.      Napi kopi luwak punika ?

4.      Napi mawinan ampas kopi punika prasida ngawantu ngubadin tatu?

1.3. Tetujon

1.      Mangda uning panelataran indik kopi lan uning soroh-soroh kopi punika.

2.      Mangda uning dampak positif lan negatif ring sajeroning nginum kopi.

3.      Mangda uning panelataran indik kopi luwak.

4.      Mangda uning napi mawinan ampas kopi prasida ngawantu ngubadin tatu.

ADIAYA II

PANELATARAN

2.1 Kopi lan Soroh-soroh Kopi

Kopi punika mawit saking basa Arab inggih punika qahwah sane artosnyane kekuatan, riantukan sane dumun kopi punika kaanggen ajengan utawi inuman sane akeh madue energi. Raris kruna qahwah mauwah malih dados kruna kahveh saking basa Turki, raris mauwah malih dados koffie saking basa Belanda. Kruna koffie raris kaserap ring basa Indonesia dados kruna kopi sane iraga anggen ngantos mangkin.

Kopi rumasuk ring kulawarga Rubiciae, bangsa coffeeae, genusnyane coffea lan spesiesnyane coffea Arabica. Kopi punika wantah entik-entikan sane kawentenannyane makehan ring sakancan genah ring Indonesia. Caciren entik-entikan punika sekadi madue don sane menyirip, kulit punyannyane mawarna coklat selem lan nenten madue punyan sane tegeh. Kopi marupa entikan soroh dikotil sane kawigunannyane akeh kaanggen inuman. Nanging sane mangkin kopi punika akeh kaangen dados ajeng-ajengan ring panegaran sane sampun maju. Kandungan kopi nenten ja madue kafein kemanten nanging kopi taler madue protein.

Sejarah kopi punika sampun kauningin ring abad ke-9. Sane kapertama, kopi punika wantah katemuan ring Ethiopia, biji kopi punik kapula olih jadma saking Ethiopia sane meneng ring dataran tinggi utawi ring pegunungan. Nanging, ritatkala bangsa Arab ngawitin madolannyane, biji kopi punika raris nglimbak ngantos ring Afrika Utara, irika biji kopi punika akeh katandur ring makasamian tegal. Ngawit saking Afrika Utara punika raris biji kopi punika prasida nglimbak ngantos Asia lan pasar Eropa, lan kekasubannyane dados inuman taler ngancan nglimbak. Ring kopi punika wenten makudang-kudang zat, inggih punika :

1.      Kafein 

Kafein inggih punika senyawa sane marupa kristal lan rasannyane pait. Kafein punika katemuang olih sujana saking Jerman, sane mawasta Ferdinand Runge ring warsa 1891. Ipun ngawetuang istilah “kafein” anggen nyihnayang senyawa kimia ring kopi. Kafeina taler kaanggen nyihnayang guaranina sane katemuang ring guarana, mateina ritatkala katemuang ring mate, lan teina ritatkala katemuang ring inuman teh. Makasamian istilah punika nyihnayang senyawa kimia sane pateh. Kafein nenten wenten ring kopi sane sampun maseduh kemanten, nanging ring ampas kopi taler kantun madue kafein. Kafein sane wenten ring ampas kopi punika prasida nguangin peradangan ring otrak sane mapaiketan sareng Alzheimer utawi silih sinunggil gering indik saraf. Lianan ring punika ampas kopi sane madue kafein taler prasida dados anti bakteri. Kafein taler prasida ngicalang sel kanker, ngicalang tumor lan ngicalang kausakan DNA.

2.      Alkaloid xantina

Xantina atau xantin, inggih punika senyawa kimia 2.6-dioksipurin utawi 2,6-purinadion. Xanthine sane wenten ring kopi punika prasida mngalebur kristal-kristal kolesterol. Yening kristal-kristal kolesterol punika meneng ring lender-lendir empedu, sinah pacang dados batu empedu. Dadosnyane sesai mginum kopi prasida ngicalang pawentukan batu empedu punika.

3.      Asam Klorogenik 

Asam klorogenat atau klorogenik inggih punika senyawa soroh fenilpropanoid sane nglimbak ring makehan entik-entikan lan kawentenannyane  prasida kaselehin. Ring sajeroning biji kopi, konsentrasi asam klorogenat  ring kopi sane tuh prasida ngantos 12%. Asam klorogenat nenten ja ngawentenang baya majeng ring manusa. Asam klorogenat prasida ngawantu nguangin resistensi insulin sane satmaka bibit saking gering diabetes militus. Yening nginum kopi sane kadar kafeinnyane endep, sinah prasida nguangin gering diabetes ngantos 30%.

Ring jagate iraga uning kalih soroh kopi, inggih punika :

1.      Kopi Arabika

Kopi arabika inggih punika soroh kopi sane kapertama katemuang lan kalimbakang olih manusa ngantos mangkin. Produksi kopi puniki ring makasamian jagat kirang langkung ngantos 70% saking makasamian soroh kopi. Ring wewidangan produksi Indonesia kirang langkung 1,3 juta hektar, nglimbak saking Sumatera Utara, Jawa lan Sulawesi. Kopi soroh arabika punika katandur oleh petani kopi ring Aceh, Sumatera Utara, Sulawesi Selatan, Bali lan Flores. Sane mangkin kopi arabika asli saking Indonesia madue prospek sane becik mangda prasida ngranjing wewidangan Eropa, utaminnyane Italia. Ring sajeroning transaksi April 2011 harga kopi robusta katilikin US$ 259 per tonnyane, puniki banget malianan sareng harga rata-rata ring warsa 2009 inggih punika US$165 per tonnyane. Asapunika taler sareng harga kopi arabika sane sampun nglintangin US$660 per tonnyane. Makudang-kudang soroh kopi arabika sampun kalimbakang ring Indonesia sekadi kopi arabika soroh Abesinia, lan arabika soroh Pasumah, Marago, Typica lan kopi arabika Congensis. Ring soang-soang soroh kopi arabika punika madue fisik ln sifat sane malianan. Provinsi Aceh lan Sumatera Utara dados sentr kopi arabika, yadiastun produksinyane kantun 35 ribu ton awarsa. Jawa Timur dados silih sinunggil sentra kopi arabika, lan sane mangkin sampun ngancan kalimbakang kopi arabika riantukan dorongan pasar dunia sane ageng. Kopi arabika (Coffea arabica) prasida tumbuh subur ring wewidangan sane tegehnyane 700-1.700m ring duur permukaan laut, suhunyane 16-20°C, madue iklim kering laminnyane 3 sasih sane awarsa punika. Kopi arabika gelis keni gering Hv, utaminnyane yening kapula ring wewidangan sane tegehnyae kirang saking 500m ring duur permukaan laut.

2.      Kopi Robusta

Kopi Robusta utawi ketah kasengguh Coffea Canephora sane dumun wantah dados entik-entikan sane prasida madue punyan sane tegehnyane ngantos makudang-kudang meter. Pamuputnyane, kopi robusta sane kapertama katemuang ring Kongo sawatara ring warsa 1895 olih Emil Laurent. Nanging lempas saking punika, wenten data sane nelatarang soroh kopi robusta puniki sampun katemuang dumunan olih kalih pangembara saking Inggris sane mawasta Richard Burton lan John Speake ring warsa 1862. Kopi Robusta (Coffea robusta Lindl, ex De Willd) rumasuk saking soroh Dicotyledonae lan genusnyane Coffea saking famili Rubiaceae. Soroh kopi punika madue akah tunggang sane tumbuhnyane tegak lurus dalemnyane kirang langkung ngantos 45cm lan mawarna kuning nguda. Punyan lan cabang kopi robusta puniki prasida tumbuh ngantos 2-5m saking permukaan tanah utawi prasida nglintangin punika, punika mapaiketan sareng wewidangan kopi punika katandur. Benih kopi robusta punika mawentuk bunder lan gilik, biasannyane lebih cenik saking kopi arabika. Kopi Robusta (Coffea robusta Lindl, ex De Willd) tumbuh becik ring zona 20° LU – 20° Ls ring Elevasi 400 – 800m DPL lan temperature warsannyane 24 – 30° c. elevasi genah kopi punika tumbuh banget mapaiketan sareng gede utawi cenik biji kopi punika, yening ring genah sane tegeh utawi lebih tinggi sinah biji kopi punika pacang dados. Makudang-kudang soroh kopi sane rumasuk kopi robusta inggih punika Quillou, Uganda, lan Chanephora, makasamian soroh punika madue karakter fisik lan sifat sane malianan.

2.2 Dampak Positif lan Negatif Nginum Kopi

Yadiatun nginum kopi sae ngilntangin wates prasida ningkatang kadar hormone stres kortisol lan prasida norong ketergantungan sareng kafein, nanging kopi madue makudang-kudang dampak, inggih punika :

Dampak positif :

1.      Kopi prasida nguredin pawentukan batu empedu

Peneliti Harvard saking warsa 2002 ngamolihang indik anak istri sane nginum kopi kirang langkung 4 gelas sarahina madue resiko 25% lebih kidik keni gering batu empedu.

2.      Kopi prasida nguredin tingkat depresi

Manut saking hasil penelitian, nginum kopi prasida nguredin resiko depresi. Para peneliti ring Harvard School of Public Health nelatarang, jadma sane nginum kopi 4 gelas utawi lebih sane sarahina punika, madue resiko 20% lebih rendah keni depresi. Nanging yening jadma sane nginum 2-3 gelas kopi sane sarahina punika madue resiko keni depresi ngantos 15%.

3.      Kopi prasida ningkatang memori

Kopi prasida ngawantu ningkatang memori jangka panjang lan jangka pendek. Studi ring warsa 2005 sane katelatarang olih Masyarakat Radiologi Amerika Utara, para sujana ngawedarang indik sane nginum kopi 2 gelas sane madue kafein tinggi, punika prasida ningkatang memori jangka pendek.

4.      Kopi nguredin risiko kanker payudara

Nginum kopi sampun mapaiketan sareng penuruna resiko kanker payudara, prostat endometrium, lan kanker hati, lan sane mapaiketan sareng estrogen, lan insulin. Studi ring warsa 2008 ring Swedia ngawedarang yening nginum kopi 2-3 gelas sarahina peasida nguangin resiko utawi menunda metunyane kanker payudara. Kopi prasida ngalepasang phytoestrogen lan flavonoid sane prasida ngawetuang kanker.

5.      Kopi prasida ningkatang metabolisme ring sajeroning angga

Studi ring warsa 2006 negesang indik kopi madue kawigunan anggen ningkatang metabolisme. Sane mangkin, para sujana nemuang indik kopi hijau sane kaambil dados suplemen sane prasida ningkatang baat ring sajeroning angga. Para peneliti nenten nyihnayang punika nenten ja kafein, nanging asam chlorogenic, ysane prasida nguangin panyerapan glukosa.

6.      Antioksidan ring kopi nglintangin jangan lan woh-wohan

Peneliti Edward Giovannucci saking Harvard, ring risetnyane sane sampun kawedarang ring Epidemiologi Cancer, Biomarkers & Prevention ngawedarang yening kopi madue antioksidan sane nglintanging jangan lan woh-wohan. Taler sampun kawedarang kandungan antioksidan ring kopi wantah sumber antioksidan sane pinih utama.

7.      Kopi prasida ningkatang stamina

Penelitian ring warsa 2008 nyimpulang indik kawigunan kafein sane prasida ngawantu atlet sumangdane prasida seger ritatkala nyalanang latian beban, taler ritatkala kirangan sirep.

8.      Nguredin risiko demensia

Para ilmuwan durung uning indik napi sane ngawinang pauwahan otak sane mapaiketan sareng gering Alzheimer. Nanging ilmuan punika malajahin indik faktor resiko demensia lan kebiasaan nginum sedang kopi sane prasida nguangin resiko gering punika. Jadma sane nginum 3-5 gelas sane sarahina, madue resiko tan keni demensia ngantos 65%.

9.      Ngalindungin saking gering Parkinson

Kopi prasida ngawantu resiko gering Parkinson majeng ring anak lanang. Anak lanang sane nginum 2-3 gelas kopi sane madue kafein tinggi madue resiko 25% tan keni gering Parkinson, yening kacingakin sareng jadma sane nenten nginum kopi. Dumun, peneliti nenten cumpu yening kafein punika prasida mawiguna anggen ngalindungin anak laning saking gering Parkinson. Nanging, penelitian nemuang gen sane kabaos GRIN2A, sane prasida ngalindungin sang sane nginum kopi saking gering Parkinson.

10.  Ngalindungin carma

Nginum 2-5 gelas kopi sarahina prasida nguangin resiko kanker kulit non-melanoma ngantos 17%. Kafein prasida ngawantu carma ngamademang sel-sel pra-kanker lan ngicalang pertumbuhan tumor.

Yadiastun asapunika, kopi taler madue dampak sane negatif. Kafein sane dados kandungan utami ring kopi punika madue sifat stimulant sane ngawenang sang sane nginum kecanduan. Kafein punika prasida mapaiketan sareng sistem kardiovaskuler sekadi paningkatan detak jantung lan tekanan rah. Puniki makudang-kudang dampak negatif yening nginum kopi :

1.      Jantung berdebar-debar

Jantung pacang berdebar-debar yening iraga akeh nginum kopi, riantukan kadar kafein sane akeh prasida mempengaruhi susumam saraf pusat ring otak. Kafein taler prasida ningkatang tekanan rah, dadosnyane sang sane madue gering hipertensi nenten dados akeh nginum kopi.

2.      Warih mawarna kuning gelap

Warna kuning gelap ring urine satmaka caciren anggan sang sane nginum kopi punika sampun dehidrasi. Kopi punika madue sifat diuretic sane prasida ngawinang dehidrasi riantukan prasida ngawinang angga ngamedalang akeh warih, sane prasida ngawinang angga kicalan akeh cairan.

3.      Satata gelisah utawi inguh

Tangan peluhan, jantung ngetug lan perasaan punika runtag, satmaka ceciren angga sang sane nginum kopi punika sampun over dosis olih kafein. Kafein punika prasida ngawetuang stress lan depresi riantukan kafein punika ngicalang zat penenang kimia ring otak sane kasengguh adenosine. Taler kafein punika prasida dados stimulant sane ngawinang kelenjar adrenalin mangda ngamedalang hormon stres sekadi adrenalin. Hormon puniki prasida ningkatang denyut jantung lan ngawinang manah runtag.

4.      Gangguan pencernaan

Weteng karasayang sungkan, seneb yening akeh nginum kopi. Riantukan kafein sane akeh prasida ningkatang produksi asam ring lambung.

5.      Sungkan ring sirah

Makudang-kudang soroh ubad sungkan ring sirah punika nganggen campuhan kafein, riantukan kandungan kafein sane akidik punika prasida nguangin rasa nyeri. Nanging, malianan yening akeh nginum kopi utawi kafein, riantukan yening kafein sane akehm sinah pacang ngawetuang sungkan ring sirah.

6.      Insomnia

Efek samping sane pinih utama yeing akeh nginum kopi inggih punika, nenten nyidang sireo utawi insomnia.

2.3 Kopi Luwak

Kopi luwak inggih punika kopi sane nasak ring punyannyane lan kaajeng olih luwak utawi lubak, raris kamedalang dados kotoran luwang. Nanging biji-biji kopi punika nenten kacerna dadosnyane wentuknyane kari utuh mawentuk biji kope. Dadosnyane ring weteng lubak punika biji kopi nglintangin proses fermentasi lan kamedalang malih dados wentuk biji sareng kotorannyane. Salanturnyane biji kopi luwak punika kabersihin lan kaproses sekadi kopi sane lianan.

Kopi luwak sekadi silih sinunggil utsaha ningkatang nilai tambah komoditas kopi, lianan ring komoditas sane sampun akeh sakadi kopi arabika (Java coffee) lan kopi reguler robusta. Sane minayang kopi luwaksareg kopi sane lianan inggih punika yening kopi luwak punika kaajeng olib luwak lan kamedalang malih mawentuk biji kopi. Dadosnyane aroma utawi bo nyane miiklan wenten rasa pait asem sane khas lan spesial.

Kopi luwak dados soroh kopi sane ajinnyane pinih maal, ngantos rumasuk ring Guiness Book of Records. 4 warsa sane dumun ajin kopi luwak puniki ring pasar internasional ngancan negehang, ngantos US$500/kg sane mawentuk kering utawi kadar airnyane 11,5%. Kabandingan saking ajin kopi biasa sane kualitas nomor 1 sane ajinnyane wantah US$4,5/kg.

Kekasuban kopi luwak puniki sampun kauningin ngantos ring dura negara, ring dura negara wenten warung sane ngadep kopi luwak (Civet Coffee) sabe ajinnyane maal pesan. Saking dumun, ritatkala penjajahan Belanda kopi luwak sampun mudue genah pinih duur, kacingak saking sisi rasa utawi ajinnyane. Nanging, riantukan dumun kualitas produk durung berkesinambungan. Sane ngawinang kopi luwak puniki madue aji sane tegeh utawi maal nenten ja lian riantukan prosesnyane kari bergantung ring alam.

Kawigunan kopi luwak lan kopi biasa wantah ja pateh kemanten, sane minayang wantah aromanyane kemanten.

2.4 Ampas Kopi Prasida Ngubadin Tatu

Nenten ja akeh parajana sane uning indik ampas kopi prasida anggen ubad tatu. Ring aab globalisasi sekadi mangkin, parajana sumangdane prasida kreatif malih nglimbakang sakancan sane wenten ring lingkungan parajanane. Silih sinunggilnyane nadosang ampas kopi anggen ubad tatu. Nganggen ampas kopi dados ubad tatu pinih becik lan ekonomis, riantukan beyanyane mudah.

Tatu inggih punika kausakan ring sajeroning struktur utawi fungsi angge, riantukan wenten paksaan utawi tekanan fisik utawi kimiawi. Nanging tatu punika prasida negesang indik tatu batin utawi perasaan. Nanging ring makalah puniki, tatu sane pacang katelatarang inggih punika tatu sane ngusakang struktur fisik.

Ritatkala ngubadin tatu wenten proses penggantian lan perbaikan fungsi jaringan sane sampun usak. Proses panyembuhan tatu puniki kasengguh proses panyembuhan primer. Ring panyembuhan primer wenten makudang-kudang tahapannyane, inggih punika :

1.      Fase Inflamasi (Reaksi).

Fase inflamasi inggih punika reaksi angga majeng ring tatu punika sane kekawitin beberapa menit lan berangsung ngantos 3 rahina usan ipun matatu. Proses perbaikan punika madue pah-pahan saking ngontol pendarahan (hemostatis), ngirim rah lan sel ka wewidangan sane matatu (inflamasi). Ring proses hemostatis, pembuluh rah sane matatu ngalamin konstriksi lan trombosit mapupul mangda prasida ngicalang pendarahan. Bekuan-bekuan rah punika ngawentuk matriks fibrin sane pacang dados kerangka anggen perbaikan sel.

2.      Fase Proliferasi (Regenerasi).

Fase proliferasi puniki kalaksanayang ring galah 3-24 rahina. Geginan utama ritatkala fase regenerasi puniki wantah ngisinin tatu antuk jaringan penyambung utawi jaringan granulasi sane wau lan nutup pah-pahan tatu punika sareng proses epitelisasi.

3.      Maturasi (Remodeling)

Maturasi inggih punika tahapan sane pihi untat ring sajeroning pangubadan tatu, pangubadan tatu puniki ngamerluang galah kirang langkung awarsa, manut saking dalem lan luas tatu punika. Serat kolagen ngalamin remodeling utawi reorganisasi sadurung ngamolihang wentuk normal.

Ampas kopi prasida ngubadin tatu riantukan ring ampas kopi punika kari wenten kandungan kafein. Kafein sane wenten ring ampas kopi puniki madue kandungan antioksidan, makehan parajana wantah nguningin indik woh-wohan lan jangan sane madue kandungan antioksidan.

Lianan ring punika, parajana wantah uning indik kafein wantah prasida ngicenin dampak negatif kemanten majeng ring angga, nanging sujatinnyane kafein ring kopi lan ampas kopi prasida kaanggen sakancan sane mawiguna.

Antioksidan inggih punika zat sane prasida ngelambatang utawi ngirangin proses oksidasi. Zat puniki prasida ngelambatang oksidasi zat sane gelis teroksidasi yadiastun konsentrasinyane akidik. Antioksidan manut saking artosnyane dados senyawa-senyawa sane ngalindungin sel saking baya radikal bebas, oksigen reaktif yening mapaiketan sareng gering, radikal bebas punika mawit saking metabolism angga utawi faktor sane lianan. Radikal bebas inggih punika spesies sane nenten stabil riantukan madue electron sane nenten madue pasangan lan ngarereh pasangan electron ring makromolekul biologi.

Protein lipidan lan DNA saking sel manusa sane nenten sungkan dados sumber electron sane becik. Kondisi oksidasi prasida ngawinang kausakan protein lan DNA, kanker, penuaan lmiwah gering sane lianan. Komponen kimia sane madue peran dados antioksidan inggih punika senyawa soroh fenolik lan polifenolik. Senyawa-senyawa soroh punika akeh katemuang ring jagat, utaminnyane ring entik-entikan, lan madue kawigunan anggen nguredang sakancan radikal bebas.

 Kafein sane madue antioksidan puniki prasida ngasilang kolagen. Kolagen inggih punika silih sinunggil protein sane nyusun angga manusa. Kawentenan kolagen ring angga manusa punika kirang langkung ngantos 30% saking makasamian protein sane wenten ring angga. Kolagen punika wantah struktur organik ngawangun asta, sendi, otot lan carma. Serat kolagen madue data tahan sane kuat majeng ring tekanan. Kruna kolagen punika mawit saking basa Yunani sane artosnyane madue sifat lekat utawi ngasilang pelekat.

Kolagen marupa protein sane kawangun antuk amino-asam, sane kawangun saking karbon, oksigen lan hydrogen. Kolagen madaging asam-amino spesifik-Glycine, prolina, hidroksiprolina lan arginin.

Kolagen punika mawiguna anggen cikal bakal jaringan sane wau ngantos kawentuknyane jaringan granulasi. Ring fase pawentukan jaringan sane wau puniki wenten proses angiogenesis, inggih punika proses pawentukan pembuluk kapiler sane wau, kaiwangan ritatkala ngawentuk angiogenesis punika pacang ngawinang proses ngubadin tatu punika sayan lami.

Sekadi sane sampun katelatarang iwau, ngenenin indik panyembuhan tatu punika nglintangin makudang-kudang proses. Kolagen puniki pacang ngawantu ring proses epitalisasi. Ring proses epitalisasi puniki kolagen pacang ngawantu proses angiogenesis.

Ring proses epitaisasi, fibroblast ngamedalang Keratinocyt Growth Factor (KGF) sane mawiguna ring stimulasi mitosis sel epidermal. Keratinisasi pacang kekawitin saking sisin tatu ngantos puput nutupin makasamian tatu punika. Fase proliferasi normal kalaksayang ngantos rahina ka 21.

Lianan ring punika kolagen taler ngawantu ring proses maturasi. Ring proses puniki kolagen mawiguna anggen ngaparipurnayang wentuk jaringan sane wau mangda prasida dados jaringan panyembuhan tatu sane kuat. Fibroblast punika ngawit ngalahin jaringan granulasi, taler warna bang saking jaringan punika sampun nguredang riantukan pembuluh sampun nguredang lan serat fibrin taler sekadi asapunika. Ring proses puniki kolagen sampun sayan ngilmbak anggen ngaryanin jaringan parut.

Sintesa kolagen pacang satata nglimbak ring fase puniki, lianan ring punika taler wenten proses pemecahan kolagen, kolagen sane nguda sane kawentuk ring fase proliferasi pacang mauwah dados kolagen tua ring fase maturasi. Lan mangda prasida ngamolihang hasil sane paripurna, sapatutnyane wenten kaseimbangan pantaraning kolagen sane kakaryanang sareng kolagen sane kamusnayang. Kawentenan kolagen sane akeh pacang dados jaringan parut.  Tatu punika kawastanin sampun seger ritatkala sampun wenten lapisan carma sane wu lan kekuatan jaringan parut, dadosnyane sang sane matatu punika sampun prasida ngaryanin geginannyane.

Nganggen ampas kopi dados ubad tatu pinih dangan, efektif lan ekonomis. Tata caranyane taler pinih dangan, mawinan ampas kopi punika wantah kausapang ring tatu punika. Ritatkala nguapang ampas kopi punika sampunang tebel pisan nanging tipis kemanten. Galah nganggen ampas kopi dados ubad puniki minabang 3 kali sarahina, inggih punika ritatkala semeng, tengai lan wengi.

Sesampune tatu punika kaubadin antuk ampas kopi, tatu punika sapatutnyane satata tuh, nenten dados keni yeh. Riantukan yening tatu punika keni yeh sinah tatu punika pacang belus lan proses pangubadan punika nenten efektif. Yening meled makarya sane –acang keni yeh, sinah tatu punika patut katutupin.

Nenten ja nika manten, nganggen ampas kopi dados ubad tatu mabinayan pisan sareng nganggen ubad merah. Yening nganggen udab merah sinah pacang ngaap, nanging yening nganggen amaps kopi nenten ja marasa ngaap, nanging marasa anget. Ampas kopi punika prasida ngawinang rasa anget riantukan ampas kopi sane becik kaanggen udab tatu inggih punika ampas kopi sane kantun anget. Nganggen ampas kopi dados ubad tatu sane nenten ngawinang ngaap punika pacang ngawinang dangan ritatkala kaanggen ngubadin tatu ring anak alit.

Nganggen ampas kopi dados ubat tatu nenten ja ngamerluang resep saking dokter. Ampas kopi punika prasida kauapin ring tatu. Yening tatunyane alit sinah pangubadannyane gelis. Usan kaubadin tatu punika prasida tuh lan seger. Nanging yening sering keni yeh sinah tatunyane pacang lami ngantosang segernyane.

Galah anggen nyegerang tatu punika manut saking kondisi tatu punika. Yening tatunyane ageng sinah ngamerluang galah sane lami. Yening tatu punika sampun keni infeksi, sinah pangubadannyane taler ngamerluang galah sane sayan lami, ngantos aminggu utawi asasih.

Ampas kopi pinih mawiguna lan aman ritatkala kaanggen ubad ring makudang-kudang soroh tatu. Sekadi tatu bered mawinan jatuh, tatu mawinan keni benda tajam, tatu keni api ngantos tatu “koreng” sane sampun keni infeksi. Sira manten prasida nganggen ampas kopi puniki anggen ubad tatu, riantukan nenten ngawinang akeh karejeng buyung lan keni infeksi.

Yening meled nganggen ampas kopi dados ubad tatu, sapatutnyane iraga nganggen ampas kopi sane murni utawi nenten madaging gula. Nanging yening madaging gula, punika nenten ja dados pikobet. Nanging nenten dados nganggen kopi sane kaadol ring warung-warung.

Yening ngubadin tatu nganggen ampas kopi saking kopi instan punika, sinah ampas kopi punika akeh madaging bahan kimia lan pengawet, dadosnyane, pacang mengganggu proses panyembuhan tatu punika. Yening nganggen ampas kopi saking ampas kopi instan minabang prasida tatu punika sayan parah lan gelis keni infeksi.

Panyembuhan tatu nganggen kopi pinih mawiguna riantukan nenten wenten bayanyane, ajinnyane mudah.

ADIAYA II

PAMUPUT

3.1 Unteng

Kopi sampun kasub ring jagate. Kopi madue kalih soroh inggih punika kopi arabika lan kopi robusta. Yening iraga nginum kopi sinah wenten makudang-kudang dampak negatif lan positifnyane, sekadi nguredang gering kanker, lan dampak negatifnyane gelis keni insomnia.

Lianan ring punika, wenten sane kabaos kopi luwak. Kopi luwak inggih punika kopi sane nasak ring punyannyane lan kaajeng olih luwak utawi lubak. Kopi luwak puniki madue kawigunan positif sane dahat mawiguna majeng ring manusa. Nanging kawentenan kopi luwak puniki targantung saking alan lan luwak utawi lubak punika.

Pangubadan tatu prasida nganggen ampas kopi, riantukan ampas kopi punika madue kafein, kafein punika madaging antioksidan sane pacang ngawentenang kolagen. Pangubadan tatu nganggen ampas kopi punika pinih efektif, mudah lan dangan tur nenten madue efek samping.

Yening iraga pacang nganggen ampas kopi dados udab tatu, sumangdena iraga nganggen ampas kopi murni, taler dados nganggen amaps kopi sane madaging gula. Nanging nenten dados nagnggen ampas kopi saking kopi instan.

3.2 Piteket

Sumangdane kriya patra punika prasida ngicenin piteket akidik lan prasida nglimbakang sakancan widya majeng ring sang sane ngawacen, parajana. Puniki wenten makudang-kudang pitiket saking sang sane makarya kriya patra punki :

1.      Sang sane ngaryanin kriya patra puniki ngarepang sumangdena kriya patra indik kopi puniki prasida ngicenin kawigunan sane positif majeng ring sang sane ngawacen lan majeng ring parajana sami taler sumangdena prasida nglimbakang kawidyan sang sane ngawacen.

2.      Ritatkala sang sane ngawacen kriya patra punika sumangdane sang sane ngawacen prasida uning napi nika kopi, prasida uning napi manten dampak yening nginum kopi punika. Taler sumangdena ritatkala ngawacen kriya patra puniki sang sane ngawacen prasida nincapang malih yening ngolah bsakancan sane wenten ring lingkungan sumangdena prasida dados barang sane mawiguna ring sajeroning kauripan sarahina.

DAFTAR PUSTAKA

Anonim. 2012. Pengertian Kopi. http://id.wikipedia.org/wiki/Kopi. Tanggal akses 20 November 2012

Aninom. 2012. Kopi Untuk Obat Luka. http://www.vitocafe.com/artikel-86/kopi-untuk-obat-luka.html. Tanggal akses 20 November 2012

Nugroho, Endi. 2011. Kopi. http://kopi.web.id/category/artikel-kopi/ (Tanggal akses 20 November 2012)

Anonim. 2012. Dampak Kopi. http://www.artikelhidupsehat.com/264/dampak-buruk-kopi-pada-tubuh-anda.htm#ixzz2EnFZGwW3 (Tanggal akses 20 November 2012)

Anonim. 2010. Jenis-jenis Kopi.  http://kedaikopiluwakindonesia.com/artikel-kopi/jenis-kopi-macam-macam-kopi/ (Tanggal akses 11 Desember 2012)

Anonim. 2012. Dampak Mengkonsumsi Kopi. http://www.anak-spg.com/2012/07/ dampak-positif-dan-negatif-mengkomsumsi.html (Tanggal akses 11 Desember 2012)